டிவி சேனல்களுக்கான டிராயின் புதிய கட்டண திட்டம் நாடு முழுவதும் இன்று முதல் அமலுக்கு வந்துள்ளது. இதன் படி, ஜிஎஸ்டி சேர்த்து 153 ரூபாய் கட்டணத்தில் தூர்தர்சனின் 25 சேனல் உட்பட 100 இலவச சேனல்கள் வழங்கப்பட உள்ளது. மற்ற 75 சேனல்களை வாடிக்கையாளர்கள் தங்களது விருப்பம் போல் தேர்வு செய்து கொள்ள வேண்டும் என்று அறிவிக்கப்பட்டுள்ளது. இந்த முறையில் சேனல்களை முன்கூட்டியே கட்டணம் செலுத்தாத வாடிக்கையாளர்களுக்கு கேபிள் டிவி சேவை நிறுத்தப்படும் என அறிவிக்கப்பட்டுள்ளது.
மத்திய தொலைத்தொடர்பு ஆணையத்தின் புதிய விதிகளுக்கு எதிர்ப்பு தெரிவித்து நாளை 16 மணிநேரம் கேபிள் டிவி ஒளிபரப்பு நிறுத்தப்படுமென தமிழ்நாடு டிஜிட்டல் ஆபரேட்டர்கள் நல சங்கம் அறிவித்துள்ளது. இதுகுறித்து மேலும் பேசிய சங்க நிர்வாகிகள், கட்டண முறையை திரும்பப் பெற வேண்டும், 18 விழுக்காடு ஜி.எஸ்.டி. வரியினை ரத்து செய்ய வேண்டும், கார்ப்பரேட் சேனல்களுக்கு வாரி வழங்கும் சலுகைகளை திரும்பப் பெற வேண்டும் உள்ளிட்ட 6 அம்ச கோரிக்கைகளை வலியுறுத்தியுள்ளனர்.
